သတို့သမီး၏ အလှအပပြင်ဆင်ခြင်း

မင်္ဂလာဧည့်ခံပွဲ အတွက်ဆိုတော့ ဓာတ်ပုံရိုက်တာရယ်၊ နောင်ပြန်ကြည့်ဖို့ အလှအပ အမှတ်တရ ကျန်ခဲ့ဖို့ရယ်အတွက် လှချင်ပချင်ကလေးကလည်း ရှိသေးတော့... လှလှပပ လုပ်ဖြစ်တယ်ပေါ့။

အစကတော့ မိတ်ကပ်ကိုယ့်ဟာကိုယ်လိမ်းပြီး ရှိပြီးသား ချိတ်တွေ ၀တ်မယ် လို့ ပြီးစလွယ်စိတ်ကူးမိပေမယ့်.. ချစ်စွာသော သူငယ်ချင်းများက ၀တ်စုံသစ်ချုပ်ပါ၊ သူတို့ လက်ဖွဲ့ပါမယ် ဆိုတာကြောင့် ၀တ်စုံအသစ်ချုပ်ရာကနေ.. မိတ်ကပ်တွေ ဆံထုံးတွေ ပန်းတွေ အထိ ချဲ့ဖြစ်သွားပါတယ်။

မှတ်တမ်းအနေနဲ့ ရေးထားရရင်တော့ ၀တ်စုံဖိုးက အောက်ပါအတိုင်းပါ။

ချိတ်လုံချည်က မြမာလာက ၀ယ်ပါတယ်။ ဆိုဈေး ၁သိန်း ၈ သောင်းကို အတူပါလာတဲ့သူငယ်ချင်း က ၁ သိန်းဆစ်လိုက်တာ ခပ်ကြာကြာလေး ဈေးညှိအပြီးမှာ ၁ သိန်း ၂ သောင်းနဲ့ ရလိုက်ပါတယ်။ (ကိုယ့်ဟာကိုယ်ဆို ၁ သိန်းခွဲ လောက်ပဲ ဆစ်မိမှာ)။ မြမာလာ ဆိုရင် ဆစ်နိုင်မှ တန်ကာကျမယ် ဆိုတာပဲ။

ချိတ်ဝယ်ပြီး ထွက်အလာမှာ အရင်က သိကျွမ်းဖူးတဲ့ (ပထမဆုံး ဘွဲ့ယူတုန်းက မိတ်ကပ်လိမ်းဖူးတဲ့ အလှဖန်တီးရှင်) နဲ့ ဆုံပါတယ်။
မင်္ဂလာဆောင်မှာလည်း သိရော၊ ငါလိမ်းပေးမယ်။ နင်လှစေရမယ်.. ဘာညာ ဘာညာ ပေါ့။ နောက်ပြီး ဒီအချိန်ဆောင်တာ သဇင်ပန်သင့်တယ်ပေါ့။ နောက် ၀တ်စုံကို ကိုမြင့်စိုးဆီမှာ အပ်၊ သူလိုက်အပ်ပေးမယ်ပေါ့။ အစစ သူစီစဉ်ပေးမယ့် အဆင့်ကို ရောက်တော့ ကိုယ်လည်း အလုပ်ရှုပ်သက်သာတာနဲ့.. အေး လုပ်ဟာ။ ဆိုပြီး ကိုမြင့်စိုးဆီမှာ အပ်ဖြစ်ပါတယ်။

အပေါ်ဝတ်ဖို့.. ကမာ စ ထပ်ဝယ်တာရယ် ရင်ခံချုပ်ဖို့ အစ ထပ်ဝယ်တာရယ် က ၁ သောင်းလောက်ထပ်ကျတယ်။
ကိုမြင့်စိုးရဲ့ ချုပ်ခ၊ ပုဝါဖိုး၊ စီးကွင့် ဖိုး စုစုပေါင်းက ၅သောင်း ၂ ထောင်ပါ။

အဲသည်တော့ ၀တ်စုံဖိုးက တစ်သိန်းရှစ်သောင်းနဲ့မှ ၂ ထောင် ကျသွားပါတယ်။ (မျက်လုံးပြူးစရာကြီးပေပဲ..နော်)

နောက်တော့ သဇင်ပန်းက တစ်ခတ်ကို ၁၅၀၀ ကျမယ်၊ အခက် ၄၀ လောက် အနည်းဆုံးပန်မှ လှမယ် ဆိုပါတယ်။ တော်ပြီဟာ.. အခတ် ၃၀ လောက်ပဲ လုပ်မယ် ဆိုတော့ နောက်ထပ် (လှစေချင်လွန်းလှတဲ့ ) သူငယ်ချင်းတစ်ယောက်က အခက် ၂၀ ၀ယ်ပြီး လက်ဆောင် ပေးတာကြောင့် .. သဇင်ပန်း အခက် ၅၀ နဲ့ ဝေေ၀ဆာဆာ လှလှပပ ဖြစ်သွားပါတယ်။ လက်ဆောင်ရတာကို အသာထားပြီး ငွေပမာဏနဲ့ တွက်ကြည့်ရင်တော့ ပန်းဖိုးက ၇ သောင်းခွဲ ကျတယ် ဆိုရမယ်။

လက်ဝတ်လက်စားကိစ်စကလည်း အလှဖန်တီးရှင်ကပဲ.. အများကြီးမ၀တ်ချင်ပါဘူးဆိုတာကို အမလေး သတို့သမီးက သတို့သမီးနဲ့ တူအောင် ၀တ်မှဖြစ်မှာပေါ့။ ဆိုပြီးသကာလ သူပဲ စီစဉ်လာပါတယ်။ ဟဲ့.. သိပ်မချဲ့ နဲ့ .. အများကြီးကျနေမယ်နော်.. လို့ အတန်တန် သတိပေးရဲ့နဲ့.. သူ့ကို မိတ်ကပ်ရယ်၊ သဇင်ပန်း အခက် ၃၀ ဖိုးရယ်၊ လက်ကိုင်ပန်းရယ်၊ ရင်ထိုးပန်း ၂ ခုဖိုးရယ်၊ အဲသည် လက်ဝတ်လက်စား စီစဉ်တာရယ် စုစုပေါင်းကို ၁ သိန်း ၄ သောင်း ရှင်းရပါတယ်။

ပေါင်းကြည့်လိုက်တော့ သတို့သမီးတစ်ယောက်ရဲ့ စရိတ်ဟာ စုစုပေါင်း ၃ သိန်းခွဲလောက် ကျသွားတဲ့သဘောပေါ့..။

ပြန်တွက်ကြည့်တော့ နှမျောလိုက်တာ။ ဒါပေမယ့် ဓာတ်ပုံလေးတွေ ပြန်ကြည့်တော့လည်း .. သဇင်ပန်းတွေ ညွတ်ပြီး လှပနေသလို ခံစားရလို့ စိတ်ချမ်းသာရတာပါပဲလေ...။

အရုဏ်ဆွမ်းကပ်

လက်မှတ်ရေးထိုးခြင်း

ဒီနေ့ လက်မှတ်ထိုးပြီး လက်ထပ်လိုက်တယ်။ လက်ထပ်ဖို့ရက်ကတော့ နောက်လ ၂၆ ရက်။ လက်မှတ်ထိုးဖို့ရက်ကို လူကြီးတွေနဲ့ မေးတော့ ဒီလ ၂၆ နဲ့ ၂၈ ကိုရွေးပေးတယ်။ သည်တော့ မှတ်ရလွယ်အောင် ဒီလ ၂၆ လက်မှတ်ထိုး နောက်လ ၂၆ ဆွမ်းကျွေးဧည့်ခံပွဲလုပ် အေးရော..။

ပြောရဦးမယ်။ လက်မှတ်ထိုးမှာက ၂၆ ရက်နေ့ ... အသိသက်သေအဖြစ်ထိုးမယ့်သူကို ၂၅မှပဲ ပြောဖြစ်တယ်။ သူက သူ့ရုံးက အမ်မ်ဒီ အားရင် ခေါ်ခဲ့လို့ရတယ်။ တစ်ယောက်ရှာ ဆိုတော့ ကိုယ့်သူငယ်ချင်းအေမီကို စဥ်းစားတယ်။ သူ့ကိုဖုန်းဆက်တိုင်း သူမအားတာနဲ့ တိုးနေတော့ မပြောဖြစ်ဘူး။ အဲသလိုနဲ့ ၂၅ ရက်နေ့သာ ရောက်လာရော ဘယ်သူ့မှ မပြောဖြစ်ဘူး။ မဗေဒါတို့ လင်မယားကို သတိရပေမယ့် အလုပ်ရှုပ်နေမှာစိုးတာရယ်၊ တကူးတက မြို့ထဲလာနေရမှာအားနာတာရယ်ကြောင့် မပြောဖြစ်တော့ဘူး။ အဲသည်တော့ ကိုယ့်ကို စိတ်ချထားတဲ့သူက ၂၅ရက်နေ့ကျတော့ လူရပြီလားမေးတော့.. ဘယ်သူ့မှ မပြောရသေးဘူး။ ခဏလေးနော် လို့ပြောပြီး သူငယ်ချင်း အိစိ လင်မယားကို လှမ်းဆက်တော့ ရှောရှောရှူရှူ အဆင်ပြေသွားတယ်။ အဲလို အဲလို..။



ရက်ရွေးတာကတော့ သူ့ဘက်ကလူကြီးတွေရွေးတာ၊ လက်မှတ်ထိုးဖို့ကျတော့ မေမေက သူ့သူငယ်ချင်းရဲ့ ညီမ တရားသူကြီးရှိတယ်။ ပုစွန်တောင်တရားရုံးမှာ။ တိုင်းတရားရုံးမှာလည်း သူ့သူငယ်ချင်းမောင် ဗိုလ်ချုပ်တစ်ယောက်ရှိတယ်။ သူစီစဉ်မယ်ဆိုတော့ ကာ.. သူ့ကို စီစဉ်ခွင့်ပေးထားရတယ်။ ၂၄ ရက်နေ့ရောက်မှ အဖြေသိရတာက တိုင်းတရားရုံးက တစ်ယောက်က နေပြည်တော်ရောက်နေသည့်အတွက် ပုစွန်တောင်တရားရုံးမှာ လက်မှတ်ထိုးရမယ် ဆိုတာ သေချာသွားတယ်။ အစ်မလတ်တုန်းကတော့ ဖေဖေ့တူမ တရားသူကြီးကလည်း ရန်ကုန်မှာ တာဝန်ကျနေတဲ့အတွက် အိမ်မှာထိုးဖြစ်တယ်။ ခုကတော့ အိမ်မှာ စီစဉ်ရမှာ ဇယားရှုပ်တာနဲ့ .. ဟိုမှာပဲ သွားထိုးပါမယ် အမေရယ် ဆိုပြီး ပြီးသွားတယ်။ တကယ်ဆို လက်မှတ်ထိုးတာ ကိုယ့်ဟာကိုယ် သွားထိုးလိုက်ရင် ပြီးတာပေမယ့် မေမေက ပါချင်တယ်။ လိုက်မှဖြစ်မယ်။ လူကြီးတစ်ယောက်ပါမှ ကောင်းမယ် ဆိုတာနဲ့ ဟုတ်ကဲ့ပေါ့။ အစ်မကြီးကလည်း သူကပုစွန်တောင် တရားရံးလိပ်စာသိသူ ဆိုတော့ သူပါမယ်ပေါ့။

အဲဒါနဲ့ မပြီးသေးပါဘူး။ ခင်ပွန်းသည်လောင်းကြီးကလည်း သူ့ရုံးရွှေ့ရပြုရနဲ့ မအားတာနဲ့.. အဲသည် လက်မှတ်ထိုးမယ့်ရက်ကို မနက်အစောပိုင်း ရုံးသွားရင်ကောင်းမလား ဘာညာ သူ့ဟာသူ ဦးနှောက်တွေ ခြောက်နေတာရယ် ဘာရယ်နဲ့.. ၂ ယောက်သားတွေ့ကြတုန်း ဘယ်လိုိစီစဉ်ကြမလဲ အဲသည်မနက်ကို လို့မေးတယ်။ အင်း.. သူက ဗိုလ်တထောင်မှာနေတာ။ ကိုယ်ကလှည်းတန်းမှာနေတာ။ လက်မှတ်ထိုးတာက ပုစွန်တောင်တရားရုံး။ သူတို့နားလေးတင်လေ..။ အဲဒါနဲ့ အလွယ်ကူဆုံးဖြစ်ရအောင်.. ကိုယ်ကပဲ.. အင်း..မနက်ကျ တရား၇ုံးမှာပဲ ဆုံတာပေါ့။ အိမ်ကနေပဲ ကားငှားလာခဲ့လိုက်မယ်လေ.. ဆိုတော့.. သူကလည်းအင်း ကောင်းသားပဲတဲ့။ အိစိတို့ကရော တရားရုံးလာမှာလား ဆိုတော့.. အင်းပေါ့။ သူတို့လည်း တရားရုံးလာလိမ့်မယ်။ လူတွေ စုံနေရင် အချိန်ကုန်တယ်။ အဲသည်မှာပဲ တွေ့ကြမယ် ဆိုပြီး ကိစ်စက ပြတ်လာတယ်။

ညကျတော့.. ဘသားချော ကိုယ့်သူငယ်ချင်းက ဖုန်းဆက်ရင်းတရားရုံးလိပ်စာမေးတယ်။ နင်ဘယ်လိုသွားမှာလဲ တဲ့..။ ငါဒီကနေ ကားငှားသွားမယ်လေ..။ ဟိုမှာဆုံကြတာပေါ့ လို့ပြောတော့.. နင့်ဟာက ပဲ့လိုက်တာဟာ.........ပဲ့လိုက်တာ။ နင်ကအဲလို သွားစရာလား။ လာမကြိုဘူးလားတဲ့။

ဟမ်.. ဟဲ့.. လာကြိုနေရရင် သူက အဲသည်နားနေတာ။ ငါ့ဆီကို သက်သက်ကြီး လာရမှာပေါ့။ လမ်းကြောမှ မသင့်တာ။ အဲဒါကြောင့် ငါ့ဟာငါ လာမယ်ပြောလိုက်တာ .. ငါက လက်တွေ့ကျကျတွေးလိုက်တာပါဟာ..ဆိုတော့.. ။အဲဒါ နင်ရှည်စရာမလိုဘူး။ နင့်ဟာနင် လော့ဂျစ်ကဲလီးပဲပြောပြော ။ ပရက်တစ်ကဲလီးပဲပြောပြော ဘေ့ဇစ်ကဲလီးပဲဖြစ်ဖြစ်၊ နောမဲလီးပဲ ဖြစ်ဖြစ် သတို့သမီးဆိုတာ အိမ်ကပဲ ထိုင်စောင့်ရတယ်။ သူ့ဟာသူဘယ်ကဘာမှာပဲ နေနေ နင့်ကို လာကြီုရမှာ...။ ဒီလိုအချိန်မှာ နင့်ကို ဖူးဖူးမှုတ်ထားရမှာ တဲ့။

အဲ.. အဲလိုပြောတဲ့အခါကျမှ သတို့သမိးဆိုတာ အိမ်ကထိုင်စောင့်ရတယ်။ သူက အဲသလို တကူးတက လာကြိုရတယ် ဆိုတာဟာ ဖူးဖူးမှုတ်ခြင်း တမျိုး လို့ ကိုယ်က ရေးရေးသဘောပေါက်ရတယ်။

အဲလိုလား..။ အေးအေး.. ငါလာကြိုခိုင်းလိုက်မယ်ဟာ.. ရပါတယ်။ သူကလာကြိုပေးမှာပါ လို့ပြောရတယ်။ အလကားနေရင်း ကိုယ့်သူငယ်ချင်းတွေက သူ့ကို အမြင်ကတ်နေရင်လည်း မကောင်းဘူးကိုး။ အေး...လာမကြိုပေးရင် ငါလာကြိုမယ်။ ငါ့ကားနဲ့ဆို ရှေ့ခန်းက ငါ့မိန်းမရယ်၊ နင်ရယ်တော့လိုက်လို့ရတယ်တဲ့။ ရပါတယ်ဟာ.. သူက ငါပြောရင် လာကြိုပေးမှာပါ။ ငါကသက်သက်မကြိုခိုင်းတာ လို့ပြောလိုက်ရတယ်။

သတို့သားကြီးကို ဖုန်းဆက်ပြီး လာကြိုပေးလို့ပြောလိုက်တယ်။ အမေလည်းလိုက်မှာ။ အစ်မလည်း လိုက်မှာလို့ ပြောတော့.. အင်း ဒါဆို ကားစီစဉ်လိုက်ဦးမယ် ဆိုပြီး နာရီဝက်လောက်နေတော့ .. ဖုန်းပြန်ဆက်တယ်။ အဆင်ပြေသွားပြီတဲ့။

အဲသည်တော့မှ မာမီမားသား မေမေ နဲ့ မိုင်စစ်စတားတို့ကို မနက်ကျရင် လာကြိုလိမ့်မယ်နော်လို့ ထွက်ပြောရတယ်။ (အဟိ.. ပထမ ကိုယ့်ဟာကိုယ်သွားမယ် ဆိုတဲ့အစိအစဉ်သူတို့ မသိလိုက်ရတာတော်သေးတယ်။ သူတို့သိရင်လည်း စိတ်ဆိုးကြဦးမလားမသိ လို့ တွေးမိသေးတယ်။ )

အထာတွေများ တယ်ရှုပ်။ အဲသည်နည်းနဲ့ သတို့သားက အိမ်အရောက်လာကြိုခြင်းအားဖြင့် ဖူးဖူးမှုတ်တယ်ဆိုတာကြီးကို ခံဖူးလိုက်တယ်ပေါ့လေ..။ အော်.. ငါ့နှယ် ဒါလေးတောင် မသိလေခြင်း လို့တွေးမိတယ်။ မိန်းမဟာ မိန်းမလိုလေး မသွားတတ်မလာတတ်သယောင် နေရမယ့် သဘောပေါ့။

လက်မှတ်ထိုးပြီး သူငယ်ချင်းတွေနဲ့ ဖီးလ်မြန်မာမှာ ထမင်းသွားစား။ နောက်သူက အိမ်ပြန်ပို့ပေးပြီး ရုံးသွားတက်ရလေရဲ့..။

သည်လိုနဲ့ပဲ.. စာချုပ်ထဲမှာ အကြင်လင်မယားဖြစ်ပြီး ကိုယ့်အိမ်မှာကိုယ် နေကြတာပေါ့။ ရယ်စရာကြီးလိုလိုပဲ..။ ကိုယ့်သူငယ်ချင်းစုံတွဲတုန်းက လက်မှတ်ထိုးတာနဲ့ လက်ထပ်ပွဲလုပ်တာ ၃ လကွာသတဲ့။ ကိုယ်တို့က ၁ လ ဆိုတော့ တော်သေးတာပေါ့။

သူငယ်ချင်းများနှင့် စကားစမြည် (၁)

မနေ့က တနင်္ဂနွေနေ့

သူငယ်ချင်းတွေနဲ့ ဆုံဖြစ်ကြတယ်။
ပျက်ကွက်ခဲ့သောလူမှုရေးတွေကို အပြေးအလွှားသွားရင်း ကျန်ခဲ့တဲ့ တစ်ပတ်က တစ်ကြိမ်ဆုံမိရာက ထပ်ချိန်းဖြစ်ကြတဲ့ ဆုံတွေ့ပွဲပေါ့။

ပြီးခဲ့တဲ့တစ်ပတ်ကဆိုရင် သူငယ်ချင်းတစ်ယောက်ရဲ့ အမေနာရေး၊ သူငယ်ချင်းတစ်ယောက်ရဲ့ သမီးမွေးနေ့၊ နောက်သူငယ်ချင်းတစ်ယောက်ရဲ့ ကလေးမီးဖွား။ ဘယ်ဟာကိုအရင်သွားရမှန်းမသိ။ နောက်သူငယ်ချင်းတစ်ယောက်က အိမ်မှာ မုန့်လုပ်စားလို့ ဖိတ်။ အလုပ်က ရှုပ်။ သည်အထဲက နာရေးကိုသွားဖို့က ရုံးချိန်ကြီးဖြစ်နေတာနဲ့ မသွားနိုင်။ သူငယ်ချင်းကလေးမွေးနေ့ကလည်း အလားတူ။ အပြေးအလွှားရုံးကနေ ခဏလစ်ပြီးသွားလိုက်မယ် ဆိုရင်တောင် အသွားအပြန် တက်စ်စီခက တင် ၅၀၀၀ လောက်ကျမှာမို့ မသွားဖြစ်။ ရုံးဆင်းချိန်မှာ ကားရှိတဲ့သူငယ်ချင်း က လှမ်းဆက်တယ်။ မ၀ါ ကလေးမီးဖွားတာ သွားကြည့်မလို့ လိုက်မလား။ လိုက်မယ်ဆို ၀င်ခေါ်မယ်တဲ့။ သည်လိုနဲ့ အဲသည်တစ်ယောက်ဆီ ရောက်ဖြစ်သွားတယ်။
ခွဲမွေးတာတဲ့..။ ခွဲမွေးထားတဲ့သူက ကလေးပွေ့ပြီး လမ်းထလျှောက်နေလို့ အံ့သြရသေးတယ်။ သူ့ဆီက ကလေးမွေးခြင်း အတွေ့အကြုံတွေ ပထမကလေးတုန်းက ရိုးရိုးမွေးဖို့ကို ဗိုက်နာတဲ့ဒဏ်မခံနိုင်လို့.. ခွဲမွေးဖြစ်တယ်ဆိုတဲ့အကြောင်းပြောတယ်။ သူကတော့ အားပါးတရပြောတယ်ကွယ်။
အဲသည် ဗိုက်နာပုံဟာလေ... ဘာနဲ့မှ မတူဘူး သိလား။ ဗိုက်ကြီး ဆုပ်ဆွဲ ပစ်လိုက်သလို နာတာ ဟ.. သိလား တဲ့။

အိမ်ထောင်ကျပြီး ကလေးလိုချင်နေပေမယ့် မရသေးတဲ့ သူငယ်ချင်းစုံတွဲရယ် .. မကြာခင် အိမ်ထောင်ပြု ပြီး ကလေးတစ်ယောက်လောက် မွေးဦးမယ် စိတ်ကူးထားတဲ့ကိုယ်ရယ် က အပြူးသားကလေးတွေ ကြည့်ရင်း.. “ဘာကြီးက ဆုပ်ဆွဲတာလဲ ဟေ...” လို့ ပြိုင်တူမေးလိုက်ကြတော့.. သူက ခဏ ကြောင်သွားပြီး “ အော်.. အေး.. နာတာကြီးကပေါ့ဟဲ့.. ” ။ တဲ့..။ နာတာကြီးက ဆုပ်ဆွဲ တယ်ဆိုတာကို ကောင်းကောင်းနားမလည်ပေမယ့်လို့.. သူက ဆက်ပြောပါတယ်။ တစ်ချက်တစ်ချက် နာပြီးသွားရင် သတိပါ လစ်သွားတာဟ တဲ့။

ခွဲမွေးတာက နာတယ်ဆိုပေမယ့်.. ထုံဆေးပြယ်မှ နည်းနည်းနာတာပါတဲ့။ ဟုတ်သည်လားမသိ။ ဟယ် ထုံဆေးထိုးထားတော့ မနာပေမယ့် သိနေမှာပေါ့နော်.. ဆိုတော့.. အေး... သိတာပေါ့တဲ့.. တစ်လွှာချင်း ခွဲနေသမျှ အကုန်သိနေတာတဲ့..။ အောင်မငေး.. အူကြိမ်းစရာကြီးပေါ့..။

ထိုင်နေရင်းကနေ.. ကြောက်စိတ်နဲ့ ကျုံ့ကျုံ့ကလေးတွေ ကွေးကွေးသွားကြတဲ့ ကိုယ်နဲ့ ကိုယ့်သူငယ်ချင်းမ ကို သူ့အမျိုးသားက ရယ်ပါတော့တယ်။

ကိုယ်တို့ တွေ ကြောက်သွားမှန်းသိတဲ့ သူငယ်ချင်းက တစ်ဖက်လှည့်နဲ့ အားပေးပါတယ်။ ဟယ်.. ကလေးမွေးရင် ခွဲမွေးရင်းနဲ့ နင်တို့ ဘာလဲ လုပ်လို့ရလဲ သိလားတဲ့။
ဗိုက်သားပေါ်က အဆီပိုတွေ တစ်ခါတည်း လှီးထုတ်လိုက်လို့၇တယ်တဲ့။ လေ့ကျင့်ခန်းလုပ်စရာမလိုတော့ဘူးတဲ့..........။ ဒါလည်း .. ဟုတ်သည်လားမသိ။ ကြားရသမျှတော့ သက်သာတာ တစ်ခုမှ မရှိပေမယ့်... အခန်းလေး ပြင်ဆင်ထားပုံကတော့ အထူးကို လှပပါတယ်။

တစ်ခန်းလုံး မိုးပျံပူပေါင်း အဖြူရောင် နဲ့ အနီရောင်တွေ .. . အမိုးမှာ ကပ်လို့.. ပူပေါင်းအောက်မှာ ဖဲကြိုးလိမ်လီမ်လေးတွေ က တွဲလောင်း...။ ပူပေါင်းတွေ နဲ့ပဲ နံရံ တစ်ဖက်မှာ စာလုံးဖော်ထားသေးတယ် hello baby တဲ့။

ဟယ်.. နင့်အခန်းလေး ပြင်ထားတာ လှလိုက်တာ ဆိုတော့ သူတို့ရုံးကလူတွေ လာဆင်ပေးသွားတာတဲ့..။ တစ်ခန်းလုံး ပူပေါင်းတွေ ပြည့်နေတာကို ကလေးလေးကတော့ ဘာမှန်းသိမယ်မထင်ဘူး။ ဒါပေမယ့် ကိုယ်ကတော့ အဲလို ပူပေါင်းတွေ အပြည့်နဲ့ အခန်းထဲမှာ ကလေးအသစ်ကလေးရတဲ့အချိန် တော်တော်ပျော်နေမယ် ထင်တယ်။ ကိုယ်လည်း ပူပေါင်းတွေ ကြိုက်တယ်လေ..။

အဲသည်ကအပြန် ည ၇ ခွဲနေပြီ။ မုန့်လုပ်စားတယ် ဆိုတဲ့ သူငယ်ချင်းအိမ်ကို ၀င်ကြတယ်။ အဲသည်အိမ်ကို ရောက်နေတဲ့ နောက်ထပ် သူငယ်ချင်း လင်မယား တစ်တွဲနဲ့ ထပ်ဆုံတယ်။

သူတု့အိမ်မှာ နောက်တစ်ရက် ကော်ရည်ခေါက်ဆွဲလုပ်စားမယ် ။ အားတယ်မဟုတ်လား လာခဲ့ကြနော်တဲ့။ ထပ်ဖိတ်တယ်။
နောက်တစ်တွဲကလည်း အားကျမခံ သူတို့အိမ်မှာ တနင်္ဂနွေ အသုတ်စုံနော် တဲ့။
အို အားတယ်။ လာမှာပေါ့။ မတွေ့တာကြာပြီလို့ ပြောခဲ့ဆိုခဲ့သေး..။

အဟက်..။ အိမ်ပြန်ရောက်တော့လည်း မောမောနဲ့ ထိုးအိပ်လိုက်တာ။ နောက်တစ်နေ့ ရုံးသွားမယ် ဆိုတော့ ကိုယ်တို့ ချိဖ်ရဲ့ ဖဲဝဲလ်ပါတီ ရှိတာကို သတိရပြိး ၀တ်စုံရွေးတော့မှ.. အို.. ညနေ ဟိုသူငယ်ချင်းအိမ် ဘယ့်နှယ်သွားနိုင်တော့မလဲ.. ။ဖုန်းပြန်ဆက်ရမယ် လို့တွေးရင်း ကိုယ့်ကိုယ်ကို လည်း မေ့တတ်ရန်ကော အပြစ်တင်ရင်း ရုံးရောက်.. အလုပ်တွေရှုပ်၊ အရှုပ်တွေလုပ်။ ဖုန်းမဆက်ဖြစ်။ ညနေ ၆ နာရီကျော်လောက်တော့.. ၅ ထပ်က ပူးလ်ဆိုဒ်က ပါတီကို ဆင်းလာ၊ ဧည့်ခံနဲ့ ရှုပ်နေရင်း စားဖို့သောက်ဖို့ စောင့်နေကြတဲ့ သူငယ်ချင်းများက ဖုန်းလှမ်းဆက်တော့မှ... ကိုယ့်နှဖူးကိုယ်ရိုက်ရင်း မေ့ပြန်ပြီ။ တောင်းပန်ရတော့တယ်။ အားတယ်လာမယ် ပြောတာ ရုံးက ပွဲကို မေ့နေလို့ ဖြစ်တဲ့အကြောင်း .. အဲဒါ မလာနိုင်တော့တာ ဖုန်းဆက်တောင်းပန်မလို့ဟာကိုလည်း မေ့သွားလို့ မဆက်ဖြစ်ရတော့တဲ့ အကြော်း.. အင်း မေ့ပဲ မေ့နိုင်လွန်းသူရယ်..။

အဲလောက် မေ့တတ်တာ စိတ်တောင်ပျက်လာပြီ။ ကိုယ့်ကိုကိုယ်..။

တနင်္ဂနွေနေ့တော့ ကိုယ့်ကို မေ့ခွင့်မပေးတော့တာက မနက် ၈ နာရီလောက် လာတဲ့ဖုန်း။ ကျန်ခဲ့တဲ့ တစ်ပတ်က ဆုံးသွားတဲ့ သူငယ်ချင်းရဲ့ အမေ ရက်လည် သွားဖို့ သူငယ်ချင်းက ဖုန်းဆက်တာ။ အေးအေး လိုက်မယ်ပေါ့။ သူ့မိန်းမက ကိုယ်တို့ဖို့ အသုတ်လုပ်ဖို့ မလိုက်နိုင်တော့ ကိုယ်ရယ် အေမီရယ်ကို ခေါ်လို့သွားမယ် ဆိုတယ်။ ကောင်းတယ်ဟေ့.. ငါတို့ ကားခမကုန်တော့ဘူး ပြီးရင် နင့်အိမ်တခါတည်းလိုက်ရုံပဲ ပေါ့။

အေမီ ဆီဖုန်းဆက်တော့.. အဟက်.. လွဲတတ်ပြန်တဲ့ ကိုယ့်သူငယ်ချင်း အေမီကတော့ (သည်တစ်ခါ သူမလွဲဘဲ သူ့ညီမအလွဲ).. စနေညက အကောင်း တနင်္ဂနွေမနက်ကျမှ ဘန်ကောက်လေယာဉ်လက်မှတ်ကောက်ဝယ်ပြီး ကသောကမျော ဘန်ကောက်လိုက်သွားလေရဲ့။ သူ့ညီမလေး (ကာတာက လေယာဉ်မယ်) ခွင့်နဲ့ ပြန်လာရင်း အိုင်ဒီကတ် မေ့ကျန်ခဲ့လို့ လိုက်ပေးရသတဲ့။ ကံကောင်းလို့အလုပ်ကိစ်စ သွားဖို့ရှိတာ ဗီဇာကြိုယူထားလို့တဲ့လေ..။ အင်း.. သည်လိုနဲ့ ကိုယ့်သူငယ်ချင်းနဲ့ ကိုယ် နှစ်ယောက်ပဲ .ရက်လည် ဆွမ်းသွပ်ရောက်။ စကားစမြည်ပြော....
အဓိကပြောဖြစ်တာကတော့.. ရောဂါကို ဟစ်စထရီ သေချာလိုက်ပြီး ဒိုင်ယာဂနို့စ် မလုပ်ဘဲ လွယ်လွယ် မြန်မြန် သတ်မှတ်ပစ်လိုက်တတတ်တဲ့ ကိုယ်တို့ဆီက အထူးကုကြီးတွေ အကြောင်း.....သူတို့ကြောင့်မှားသွားရင် လူနာကပဲ ခံရတဲ့အကြောင်း............ ကိုယ့်မေမေလည်း သည်လိုဆိုတော့ ဒါတွေ ပြောဖြစ်တာပဲ။

အဲသည်ကအပြန်တော့ အသုတ်စုံ တွေ စိတ်ကြိုက်နယ်ကြ၊ ဖတ်ကြ၊ သုတ်ကြရင်း စားကြရင်းရောက်တတ်ရာရာ ငယ်ငယ်က အကြော်ငးတွေ ပြောကြရင်း .... တစ်နေ့တာကို အငြိမ်းသားဖြတ်ကျော်ဖြစ်ခဲ့ကြပါတယ်။

ကိုယ့်ရဲ့ ခင်ပွန်းလောင်းကို ကောင်းကောင်းမသိကြတဲ့ သူတို့တွေက ဘယ်လိုလူမျိုးလဲ သိရအောင် ကိုယ်သိသမျှ လေးတွေ ပြောရင်း .. သူက ကောင်းပါတယ်။ အင်း.. ဂရုစိုက်တတ်ပါတယ်။ နားလည်တတ်တဲ့ပုံပါပဲ ဘာညာ ဘာညာ. .. ပြောရသေး...။ ကိုယ့်သူငယ်ချင်းကနောက်သေးတယ်.. .နင်တကယ် သေချာတယ်နော်.. .ယူတော့မှာ တဲ့။ အဟက်.. ။အေးပါ .. ယူမှာ သေချာပါတယ် လို့ပြောတော့.. ။အင်း ယောက်ျားယူမှာကတော့ သေချာတယ်။ ယူမယ့်ယောက်ျားတော့ စိတ်ကူးပေါက်လို့ ဆိုပြီး ထပြောင်းမနေနဲ့ နော်တဲ့..။
သည်လို နောက်နောက်ပြောင်ပြောင်ပါပဲ။ သူပါရင်တော့ ကိုယ့်သူငယ်ချင်းတွေ နဲ့ တသားတည်းကျမလား ကြောင်နေမလား မသိလို့. တွေးနေမိသေးတယ်။